မြန်မာနိုင်ငံ၌ ကင်ဆာဖြစ်ပွားသူဦးရေ နှစ်စဉ်မြင့်မားလာပြီး ခန့်မှန်းခြေ လူတစ်သိန်းတွင် ရောဂါဖြစ်ပွားသူ ၁၅၀ ခန့်ရှိ

မြန်မာနိုင်ငံတွင် ကင်ဆာဖြစ်ပွားသူဦးရေ နှစ်စဉ်မြင့်မားလာပြီး ခန့်မှန်းခြေ လူတစ်သိန်းတွင် ရောဂါဖြစ်ပွားသူ ဦးရေ ၁၅၀ ခန့်ရှိကြောင်း ကင်ဆာအထူးကု ဆရာဝန်ကြီး ပါမောက္ခ ဒေါက်တာစိုးအောင်၏ ပြောကြားချက်များအရ သိရသည်။

မြန်မာနိုင်ငံ အပါအ၀င် ဖွံ့ဖြိုးဆဲ နိုင်ငံများတွင် ကင်ဆာကြောင့် သေဆုံးသူ ဦးရေမှာ ကမ္ဘာ့ကျန်းမာရေး အဖွဲ့၏ ခန့်မှန်းတွက်ချက် မှုများအရ လူဦးရေ သုံးသန်းအထက်တွင် ရှိနေကြောင်းနှင့် မြန်မာနိုင်ငံ အပါအ၀င် ဖွံ့ဖြိုးဆဲ နိုင်ငံများတွင် လာမည့် နှစ်နှစ်အတွင်း ကင်ဆာကြောင့် သေဆုံးမှုနှုန်း နှစ်ဆတိုးမြှင့် လာနိုင်သည်ဟု ကမ္ဘာ့ကျန်းမာရေး အဖွဲ့က ခန့်မှန်းတွက်ချက်ထားကြောင်း သိရသည်။

ထို့ပြင် ကမ္ဘာ့ကျန်းမာရေး အဖွဲ့၏ ခန့်မှန်းတွက်ချက် မှုများအရ လာမည့်နှစ်များတွင် တစ်ကမ္ဘာလုံး၌ လူလေးဦးတွင် တစ်ဦးနှုန်း ကင်ဆာဖြစ်ပွား လာနိုင်သည်ဟု ထုတ်ပြန်ထားကြောင်းနှင့် လူတစ်ဦးချင်း
အနေဖြင့် ကင်ဆာဖြစ်ပွားနိုင်ခြေမှာ ပုံမှန်အားဖြင့် ၂၅ ရာခိုင်နှုန်းခန့်သာ ရှိနေသော်လည်း ပြောင်းလဲလာသည့် လူနေမှု ပုံစံများကြောင့် ကင်ဆာဖြစ်နှုန်းများမှာ နိုင်ငံတိုင်းတွင် တဖြည်းဖြည်း မြင့်တက်လာခြင်းဖြစ်ကြောင်း သိရသည်။

ကင်ဆာဖြစ်ရခြင်း အကြောင်းရင်းများအနက် အစားအသောက်ကြောင့် ဖြစ်ပွားမှုနှုန်းမှာ ၃၅ ရာခိုင်နှုန်းဖြင့် အမြင့်ဆုံး နေရာတွင် ရှိနေပြီး ယင်းနောက်တွင် ဆေးလိပ်နှင့် ဆေးရွက်ကြီး သုံးစွဲမှုကြောင့် ၃၀ ရာခိုင်နှုန်း၊ ဗိုင်းရပ်စ်ပိုးများကြောင့် ၁၀ ရာခိုင်နှုန်းနှင့် လိင်ဆက်ဆံမှုများကြောင့် ခုနစ်ရာခိုင်နှုန်း အသီးသီး ရှိနေကြောင်း သိရသည်။

မြန်မာနိုင်ငံတွင် အဆုတ်ကင်ဆာ၊ သားအိမ်ခေါင်းကင်ဆာနှင့် ရင်သားကင်ဆာ ဖြစ်ပွားနှုန်းမှာ ရောဂါအဖြစ်အများဆုံး နေရာတွင် ရှိနေပြီး သုတေသန ပြုလုပ်ချက်များအရ ကင်ဆာဖြစ်ပွားသူ အချိုးတွင် အမျိုးသမီး အချိုးမှာ အမျိုးသားများထက် ပိုမိုများပြားနေကြောင်း ပါမောက္ခ ဒေါက်တာစိုးအောင်က ဆိုသည်။

အဆုတ်ကင်ဆာသည် အမျိုးသားများ သာမက အမျိုးသမီးများတွင်ပါ ဖြစ်ပွားမှုနှုန်း များပြားလာကြောင်းနှင့် ကျန်ဖြစ်ပွားမှု အများဆုံး ကင်ဆာနှစ်မျိုးလုံးမှာ အမျိုးသမီးများတွင်သာ ဖြစ်ပွားတတ်သည့် ကင်ဆာများ ဖြစ်နေသည့်အတွက် အမျိုးသမီး အချိုးမှာ ပိုမိုများပြား နေရခြင်းဖြစ်ကြောင်း သိရသည်။

မြန်မာနိုင်ငံတွင် ကင်ဆာဝေဒနာရှင်များကို ကုသပေးနေသည့် ကင်ဆာဌာနကြီး သုံးခုဖြစ်သည့် ရန်ကုန်ပြည်သူ့ဆေးရုံကြီး၊ မန္တလေး ပြည်သူ့ဆေးရုံကြီးနှင့် တောင်ကြီး စ၀်စံထွန်း ဆေးရုံကြီးများတွင် တစ်နှစ်လျှင် ပျမ်းမျှလူနာသစ် ၇၀၀၀ ကျော် ရှိနေပြီး ကုသမှု အပိုင်းနှင့် လူနာဦးရေမှာ ကွာဟချက် များစွာရှိနေကြောင်း သိရသည်။

ကမ္ဘာ့ကျန်းမာရေး အဖွဲ့က ခန့်မှန်းတွက်ချက် မှုများအရ မြန်မာနိုင်ငံတွင် ကင်ဆာရောဂါများ အပါအ၀င် ကူးစက်မဟုတ်သော ရောဂါဖြစ်ပွားမှုနှုန်းမှာ လာမည့်ခုနစ်နှစ်အတွင်း ယခုထက် သုံးဆကျော်အထိ မြင့်တက်လာနိုင်သည်ဟု ခန့်မှန်းထားကြောင်းနှင့် မြန်မာနိုင်ငံတွင် ကူးစက်ရောဂါများ ဖြစ်ပွားမှုနှုန်းမှာ ၃၀ ရာခိုင်နှုန်းခန့် ရှိနေပြီး ကူးစက်မဟုတ်သော ရောဂါများဖြစ်သည့် နှလုံးသွေးကြောကျဉ်းရောဂါ၊ ကင်ဆာရောဂါများ၊ ဆီးချိုသွေးချို၊ နာတာရှည် အသက်ရှုလမ်းကြောင်းဆိုင်ရာ ရောဂါများ၊ ထိခိုက်ဒဏ်ရာနှင့် အခြားကူးစက် မဟုတ်သော ရောဂါ၏ ဖြစ်ပွားနှုန်းမှာ ၇၀ ရာခိုင်နှုန်းခန့် ရှိနေကြောင်း သိရသည်။

ဦးလှထွန်း မေတ္တာရိပ်မွန် (ကင်ဆာ) ဖောင်ဒေးရှင်းရှိ ကျန်းမာရေး ၀န်ထမ်းများမှ ဝေဒနာရှင်များအား ဆေးတိုက်ရန် ပြင်ဆင်နေစဉ် (ဓာတ်ပုံ-အိသဉ္ဇာကျော်)