တရားမ၀င် မှောင်ခိုလမ်းကြောင်းမှ အရက်၊ ဘီယာ၊ စီးကရက် ၀င်ရောက်မှုများတွင် ဘီယာတစ်မျိုးတည်း တင်သွင်းမှု တစ်နှစ်လျှင် လီတာ ၂၆ သန်းခန့်ရှိနေ

ဂိုဒေါင်တစ်ခုအတွင်း ဖမ်းမိသော ၀ိုင်နှင့်ဘီယာပုလင်းများကို Mobile Team အဖွဲ့မှ စစ်ဆေးနေစဉ်

မြန်မာနိုင်ငံတွင် အရက်၊ ဘီယာ၊ စီးကရက် တရားဝင်လမ်းကြောင်းမှ တင်သွင်းမှု ပိတ်ပင်ထားသော်လည်း မှောင်ခိုလမ်းကြောင်းမှ ၀င်ရောက်မှုများကြောင့် ဘီယာတစ်မျိုးတည်း တင်သွင်းမှု တစ်နှစ်လျှင် လီတာ ၂၆ သန်းခန့်ရှိနေကြောင်း ဒီဇင်ဘာ ၂၄ ရက်က ရန်ကုန်မြို့ မြန်မာနိုင်ငံ ရင်းနှီးမြှုပ်နှံမှု ကော်မရှင်ရုံး၌ ပြုလုပ်သော သတင်းစာရှင်းလင်းပွဲတွင် မြန်မာနိုင်ငံ ရင်းနှီးမြှုပ်နှံမှု ကော်မရှင်မှ ညွှန်ကြားရေးမှူးချုပ် ဦးအောင်နိုင်ဦးက ပြောကြားသည်။

“နိုင်ငံတော်က ပိတ်ထားတယ်ဆိုတာက ဘာလဲဆိုတော့ သူတို့က ကောင်းကျိုးထက် ဆိုးကျိုးပိုဖြစ်နိုင်တဲ့ လုပ်ငန်းတွေလို့ သတ်မှတ်ထားလို့ပါ။ ကောင်းတာ ဘာရှိလဲဆိုတော့ တိုင်းပြည်အတွက် အခွန်ရတယ်ပေါ့။ သို့သော် တစ်ဖက်က လူတွေရဲ့ ကျန်းမာရေးနဲ့ ပတ်သက်တဲ့ ကိစ္စတွေလည်း ရှိနေတယ်။ အခုအစိုးရ လက်ထက်မှာ စီးကရက်လုပ်ငန်းနဲ့ ပတ်သက်ရင် Investment ကို ခွင့်မပြုဘူးလို့တော့ မပြောဘူး။ ဒါပေမဲ့ ကန့်သတ်ချက်တွေတော့ များများထည့်ထားတယ်။ ပြည်တွင်းကထွက်တဲ့ ကုန်ကြမ်းရာခိုင်နှုန်း ၅၀ ထည့်ရမယ်။ ပြီးရင် ထွက်သမျှစီးကရက်ရဲ့ ရာခိုင်နှုန်း ၉၀ ကို ပြည်ပကို ပြန်တင်ပို့ရမယ် ဆိုပြီးတော့ပေါ့” ဟု ဦးအောင်နိုင်ဦးက ပြောကြားသည်။

ဆက်လက်၍ ၎င်းက “နောက်တစ်ခုက ဘီယာပေါ့။ ဒါနဲ့ ပတ်သက်ပြီး အယူအဆတွေ အမျိုးမျိုးရှိတယ်။ တချို့က MIC က ဖွင့်သင့်တယ်လို့ ပြောတာလည်း ရှိတယ်။ တချို့က မဖွင့်သင့်ဘူးလို့ ပြောတာလည်း ရှိနေတယ်။ အယူအဆ အမျိုးမျိုး ရှိတာပေါ့။ ဒါနဲ့ပတ်သက်ပြီး MIC က ဘာလုပ်သင့်လဲ ဆိုတာကို လွန်ခဲ့တဲ့ လေးငါးခြောက်လလောက်ကပဲစပြီး ဆွေးနွေးကြပါတယ်။ သက်ဆိုင်ရာ ၀န်ကြီးဌာနတွေလည်း ခေါ်ပါတယ်။ ကျွန်တော်တို့ရဲ့ Review အရဆိုရင်တော့ မြန်မာနိုင်ငံဟာ ဘီယာသောက်သုံးမှု အနိမ့်ဆုံးနိုင်ငံပါ။ တချို့နိုင်ငံတွေက လူတစ်ဦးရဲ့ သုံးစွဲမှုက လီတာ ၃၀ အထိရှိတယ်။ မြန်မာနိုင်ငံက ငါးလီတာလောက်ပဲ ရှိတယ်။ ဒါနဲ့ ပြည်တွင်းထုတ်လုပ်နိုင်မှုကို ပြန်ကြည့်တော့ MIC က ခွင့်ပြုထားတာ စုစုပေါင်း ငါးရုံရှိတယ်။ နောက်တစ်ခုက မန္တလေး ဘီယာစက်ရုံ၊ ရှေးကတည်းက ရှိတယ်။ ဒါက MIC permit တော့မဟုတ်ဘူး။ ဒီအထဲက သုံးရုံက အခုမှဆောက်လုပ်ဆဲ။ ၂၀၁၅ လောက်မှ ထုတ်နိုင်မှာပေါ့။ အခု ဘီယာထုတ်တဲ့ စက်ရုံက မြန်မာပြည်မှာ သုံးရုံပဲရှိတယ်။ ဒီစက်ရုံသုံးရုံရဲ့ ထုတ်လုပ်နိုင်မှုက တစ်နှစ်ကို လီတာသန်း ၂၀ ပဲရှိတယ်။ အဲဒီတော့ ကျွန်တော်တို့က Per Capital Consumption ကို အခြေခံပြီးတော့ ၁၈ နှစ်အထက် လူဦးရေနဲ့တွက်တော့ ယောက်ျားလေးပေါ့လေ။ မြန်မာနိုင်ငံရဲ့ တစ်နှစ်သုံးစွဲမှုအားက လီတာ ၄၆ သန်းလောက်ရှိတယ်။ ဒါက စစ်တမ်းအရ သိရပါတယ်။ ရှိတော့သောက်နေတာက ၄၆ သန်းလောက်ပဲရှိတယ်။ ထုတ်နေတာက သန်း ၂၀ လောက်ပဲဆိုတော့ ၂၆ သန်းက ဘယ်ကလာလဲ။ ကုန်သွယ်ရေးကလဲ ပိတ်ထားတယ်ပြောတယ်။ ဆိုတော့စဉ်းစားကြည်ပေါ့” ဟု ဆိုသည်။

အလားတူ Life Style အပြောင်းအလဲ ရှိသောကြောင့် နောက်ပိုင်းတွင်လည်း ဘီယာသောက်သုံးမှု မြင့်တက်လာနိုင်ကြောင်း လက်ရှိတွင် အမျိုးသမီးများပါ ဘီယာသောက်သုံးမှုများ ရှိလာကြောင်း၊ ထို့အတွက် နောက်ပိုင်းမှောင်ခိုဝင်ရောက်မှု ယခုနှစ်ထက် ပိုများလာနိုင်ကြောင်း သိရသည်။

“နောက်တစ်ခုက ၂၀၁၅ ဆိုရင် AEC စတော့မယ်။ ကုန်သွယ်ရေး ရှုထောင့်က ကြည့်ပြန်တော့ အာဆီယံရဲ့ အကောက်ခွန်နှုန်းထားက ဘီယာအတွက်ဆို သုညရာခိုင်နှုန်းပဲရှိတယ်။ ဥပမာ ကုန်သွယ်ရေးက ခွင့်ပြုလို့ ဘီယာကို တရားဝင် တင်သွင်းလိုက်ပြီဆိုရင် ဆိုလိုတာက အခုအချိန်မှာ ကုန်သွယ်ရေးက မူဝါဒအရ ပိတ်ထားပေမယ့် ၂၀၁၅ မှာ ပိတ်လို့မရတော့ဘူး။ အဲဒီတော့ ကိုယ့်တိုင်းပြည်ကလည်း မထုတ်နိုင်ဘူး။ တစ်ချိန်မှာ ကိုယ့်တိုင်းပြည်ထဲကို ဘီယာတွေက အကောက်ခွန် သုညရာခိုင်နှုန်းနဲ့ ၀င်လာရင် ကုန်သွယ်ရေးမှာပါ Trade Deficit ဖြစ်သွားမယ်” ဟု ၎င်းကဆိုသည်။

ယင်းအနေအထားများကြောင့် ဘီယာမှောင်ခိုမှုများ ရှိနေကြောင်း၊ Trade Balance ကို ပြန်ကြည့်ပါက ထိုင်းနှင့်မြန်မာ ကွာဟမှုများရှိနေကြောင်း၊ ထိုင်းဘက်တွင် Beer Export စာရင်းများရှိနေကြောင်း၊ မြန်မာဘက်က ပိတ်ထားသည့်အတွက် စာရင်းပျောက်နေကြောင်း၊ ၂၀၁၃ ခုနှစ် ဇူလိုင်တစ်လတည်း၌ပင် မြန်မာနိုင်ငံအတွင်းသို့ မြ၀တီကုန်သွယ်ရေး လမ်းကြောင်းမှတစ်ဆင့် ၀င်ရောက်လာသော အရက်နှင့်ဘီယာ တန်ဖိုးအားဖြင့် အမေရိကန်ဒေါ်လာ ၇ ဒသမ ၁၂၄ သန်းရှိကြောင်း၊ မြန်မာနိုင်ငံတွင် ဘီယာတင်သွင်းမှုကြောင့် နှစ်စဉ်အမေရိကန်ဒေါ်လာ အခွန်ငွေ ၂၇ သန်းခန့် နိုင်ငံတော်မှ နစ်နာနေကြောင်း သိရသည်။

Posted in: ပြည်တွင်းသတင်း